Lasibatry ny jiolahy manodidina ny valo ny vehivavy iray sy ny zanany kely iray, vao herintaona, tao an-tampon-tanànan’i Malaimbady, afak’omaly alina, tokony tamin’ny 11 ora sy sasany. Tsy mbola hita izy mianaka hatramin’ny omaly hariva. Efa tafiditra any amin’ ny kaominina Mandrosonoro-Ambatofinandrahana ireo mpanara-dia any ireo dahalo, omaly.

“Tonga nanafika tao Tsinjorana, fokontany farany atsimo, ao Malaimbandy ireo jiolahy manodidina ny valo nitondra fitaovam-piadiana, tamin’io alina io. Rehefa tsy nahita vola izy ireo dia ny kojakoja ao an-trano sy valizy nisy ny akanjo tao amin’ny tokantrano iray no lasany. Nentin’izy ireo niaraka taminy ihany koa ny vehivavy iray, manodidina ny 30 taona, sy ny zanany, herintaona”, hoy ny loharanom-baovao avy any an-toerana. Nohazavain’ny teo anivon’ ny Zandarimaria fa: “tonga haingana teny amin’io toerana io ireo zandary, saingy efa tafaporitsaka ireo jiolahy niaraka tamin’izy mianaka. Araka ny vaovao farany dia efa any Jangina, ao anatin’ny kaominina Mandrosonoro Ambatofinandrahana ireo mpanara-dia androany hariva (Omaly). Nisy valizy iray feno akanjo nalatsak’ ireo jiolahy teny an-dalana”, hoy ny avy amin’ny Zandarimaria. Mitohy ny fanarahan-dia.